ilmu IKHLAS

Ngerasa udah banyak bantuin, eh malah disakitin. 

Itu deh gulana lakon Bang Golok hari ini. Ceritanya dulu waktu Wak Jukinya masih gak punya apa-apa, belom mentereng deh pokoknya. Bang Golok sering banget minjemin duit, kadang karna sianan (kasihanan - kasihan) uwak nya  gak dikasi minjem, "ambil aje deh buat Uwak, sianan tuh si Enur belon makan".

Gak keitung udah berapa banyak yang Bang Golok keluarin, belon lagi enyaknya yang diem-diem suka ngasi. Tapi sekarang….Buahh!!! 

Sejak Wak Juki ikut makelarin tanah bareng Wan Hasan, die jebol sampe puluan kali. makenye bandanye makin hari makin nyohor aje. Dulu mah kemane-mane dia sampe nyeker, sekarang dokarnye aja udah ada 2 biji. Beda dah sama Wak Juki yang dulu. 

Tapi yang diseselin orang-orang nih, Wak Juki jadi belagu, pernah kali waktu Bang Golok dateng, kagak disuruh masuk tuh, itu juga kusir dokar yang nyamperin " Bang, kate tuan aye, abang nunggu aje di situ tuh, depan pager" 

JGER!!! kayak kesamber gledek rasanya ni ati, bang Golok gak abis mikir, peret banget tuh orang sekarang.

Pulang ke rumah diceritain semua tuh sama enyaknye. Tapi emang dasar orang tua ye…, nggak nyampe deh ilmu akhlak kita nyaingin die.

"Udah Lok, lu ikhlasin aje, jangan lu ungkitin lagi yang lu dah keluarin buat die, ikhlasin ye…"

     "kesel banget nyak aye…" 

"Iye udah lu ikhlasin aje"

     "Emang ikhlas apaan sih nyak, sampe begitunye enyak nyuruh aye ikhlas? susah lagi buat ikhlas"

"Auu.. Lok, apaan tuh ikhlas? Enyak aje udah lupa."

   "Yah enyak… gimane sih, kan enyak yang nyuruh aye kudu ikhlas , enyak aje kagak tau apaan itu   

    ikhlas?"

"Bukan kagak tau lok, tapi enyak lupa"

"Nah enyak mao nanya nih sama elu,  sebulanan eni nih, dah berape kali lu ke jamban?"

     "Yah enyak….lagi ngomongin ikhlas, mala-an (malahan) nanyain jamban, gimane sih nyak?"

"Iye…lu emang dah berape kali?"

     "A.uu ah nyak,  aye aje lupa.."

"Nah tuh lu lupa juga? kan lu masih muda.."

     "iyenya, abis enyak nanyanye ade-ade aje sih"

"Looook, enyak kasi tau yee, ikhlas tuh kayak orang yang pengen buang hajat di jamban, banyangin kalo lo nggak bisa buang hajat, lu bakalan sakit lok. Makenye lu kudu sering bantuin orang lok, biar orang itu begimana lagunya sama elu, lu bantuin terus, sampe lu lupa dah berape banyak lu bantuin orang-orang, nah pas lu udah lupa,  itudah yang namanye ikhlas. Emang pantes lok kotoran yang udah lu buang ke jamban lu itung-itung lagi? Sekarang lu lupain dah semua yang udah lu kasih ke uwak lu, gimane?

Enyak…enyak, emang kagak  ada matinye kalo ngasih nasehat.

Enyak langsung ngeloyor, kayaknye dia udah lupa tuh abis ngajarin kebaekan sama anaknye….